Exodus 6
1Muri e BAKOVI DAGI i takia e Moses, “Ngane bara o masia a naro ga ratea ne Parao. Muholi hateka, na tuhakanga nau ga ratea ge longo ne mua mu vano. Na tuhakanga nau ga kinikuia ge tono tala mua na robo vona.”2 aA Vure i taki tabua e Moses, “Iau kunana e BAKOVI DAGI. 3Hosi a bele ne Abraham, ne Isak, ne Iakop. To lohoka vona Iau A Vure Tuhaka. Pali iau i uka ma a vakalongo tou vona a ragu ge BAKOVI DAGI to go lohoka vona. 4A ta turane tou na ngava dagi, a ta muholi hateka ga habia ne tou a malala e Kenan, ra malala to made muga vona manga a mosi. 5E huriki a Egipto ri vakavora hateka e huriki a Israel ri rata ria ri tangi. Ngane a longoa pali a nitangi ne ria. A luhoi tabua a ngava dagi a takia ne ria.
6“Ngane o vakalongo e huriki a Israel vona a nitagu, ‘Iau kunana e BAKOVI DAGI. Ga korimule mua na limane huriki a Egipto na maka maregoa ri rata virihi mua vona. Na nitora dagi nau ga pelekado ria ga ratapile ria, ga korimule mua. 7Ga bole mua ge mua a ngate nau, pali iau ge iau a Vure ne mua. Muri bara tuli tala mua o Egipto, a tanga ni vakavora mua vona. Na tahuna iea bara mu lohoka vona iau kunana e BAKOVI DAGI, a Vure ne mua. 8Ga taparaki mua na malala a ta muholi vona ga habia ne Abraham, ne Isak, ne Iakop. Ga habia ne mua a malala iea bara mu made liu vona. Iau e BAKOVI DAGI a takia pali a ngava iea.’”
9E Moses i vakalongo e huriki a Israel vona a ngava iea, pali ria i uka ma ri longo maia, a vuhuna ri bole a nimadihi dagi, i viliha a niluhoi ne ria.
10Muri e BAKOVI DAGI i takia e Moses, 11“O vano o takia e Parao a hariki o Egipto, ge longo ne ria e huriki a Israel ri gi vano.”
12Pali e Moses i koli, i ta maea, “E huriki a Israel i uka ma ri longototo a ngava a taki ria vona. Pali e Parao ge longototo navai a nitagu, a vuhuna a ta korokoro.” 13Ngane e BAKOVI DAGI i taki e Moses e Aron ru gu takia e Parao ge vakamariu tala o Egipto e huriki a Israel.
E Huriki a Hamone Moses e Aron
14E huriki a gare na maka kabu ne Israel ra nga, e Reuben a tabua ne Israel. E tuna bakovi i va, e Hanok, e Palu, e Herson, e Karmi. E huriki a hamone Reuben, ri mapoda tala na bakovi nga.15E Simion e tuna i polotara, e Iemuel, e Iamin, e Ohad, e Iakin, e Sohar, e Saul. E kinane Saul a ngatavine o Kenan. E huriki a hamone Simion ri mapoda na bakovi nga.
16 bE Levi e tuna i tolu, e Gerson, e Kohat, e Merari. E Levi i tahoka a pida i 137, muri i mate. 17E Gerson i tahoka e tuna i rua, e Libni e Simei.
18E tune Kohat i va, e Amram, e Ishar, e Hebron, e Usiel. E Kohat i tahoka a pida i 133, muri i mate.
19E Merari e tuna i rua, e Mali e Musi. Ra bakovi nga ru mapoda tala na kabu ne Levi, ni ramai na nuverei ne rua.
20E Amram i parangi mule e balona e Iokebet, lakea e Iokebet i poda e Aron e Moses. E Amram i tahoka a pida i 137, muri i mate.
21E Ishar e tuna i tolu, e Kora, e Nepeg, e Sikri.
22E Usiel e tuna i tolu, e Misael, e Elsapan, e Sitri.
23E Aron i parangi e Eliseba e tune Aminadab, e kurabane Nason. E Eliseba i poda e Nadap, e Abihu, e Eleasar, e Itamar.
24E Kora i tahoka e tuna ala tolu, e Asir, e Elkana, e Abiasap. Ra bakovi nga to mapoda tala na kabu ne Kora.
25E Eleasar e tune Aron bakovi i parangi e tune Putiel ngatavine, lakea i podea e Pinias.
Re huriki a gare nga a hamone Levi ni here ramai a kabu takutaku ne ria.
26E BAKOVI DAGI i taki e Aron e Moses, rua kunana ru gu bole tala e huriki a Israel o Egipto. 27Rua kunana ru gu takia e Parao a hariki o Egipto ge longo ne huriki a Israel ri gi vano. Rua kunana, e Aron e Moses, ru gu rata a ngava.
E Aron ge Ta Polo ne Moses
28Na tahuna e BAKOVI DAGI i ta turane Moses o Egipto 29i ta maea, “Iau e BAKOVI DAGI. O vano o vakalongoa e Parao, a hariki o Egipto, na maka ngava a taki ioe vona.”30Pali e Moses i takia e BAKOVI DAGI, “O lohoka vona iau a ta korokoro, i navai e Parao ge longo mai iau?”
Copyright information for
BNP